Квенщал

Кве́нщал, яги лихи́нал — гIурдахIаназулги (микобионт) микроскопикиял гIурччинал лъелхурдузулги яги цианобактериязул (фотобионт, яги фикобионт) симбиотикияб ассоциация; микобионталъ лIугьинабула жинлIа фотобионталъул клеткаби рукIунеб таллом. Цо къокъиниб букIине бегьула 26 000-даса цIикIкIараб регI.

БодулI гьелде ри́тIучIихер, ка́рхер-инги абула.

Этимология

Аваралъул этимология чIезабун гьечIо, хIо фольк-этимологиялда рекъон, гьеб «квен» абураб рагIудасан «-щи» суффиксалъул квекудалъун лIугьун буго, ритучӀица гьеб кваналеб букIиндал, «ритIучIица кваналеб хер» гIадин. БатIияб къагIидаялъ авараз гьелде ри́тIучIихеринги абула. Латинаб lichen бачIана инсгрек. λειχήν «квенщи» рагIудасан.

Микобионт, фотобионт ги гьезул симбиоз

Квенщал ккола жидер лага (таллом) микобионтги лъелхурдулги ги/яги цианобактериалиял клеткабиги (фотобионт) цолъун ккарал симбиотикиял организмал.

КIикомпонентиял квенщалин абула цо гIурдахIанил регIулIанги, цианобактериялдалъунги (цианоквенщи кин, масала, Peltigera horizontalis) яги цо регIул лъелхаридалъунги (фикоквенщи, масала, Cetraria islandica) гьел лIугьун ругони. Цо гIурдахIанил регIудалъунги, кIиго батIияб фотобионталдалъунги (цо цианобактерияги, цо лъелхерги, хIо киданиги кIиго цианобактерия, я кIиго лъелхер) абула лъакомпонентиял-ин (масала, Stereocaulon alpinum). КIикомпонентиял квенщазул лъелхурдул яги цианобактериял автотрофго кванала. Лъакомпонентиял квенщазулI лъелхер автотрофго кванала, цианобактерия, бихьавухъе, гетеротрофго кванала, азотфиксация гьабулего.

Лъалелщинал гIурдахIаназда гьоркьоса квенщал лIугьинарулI гьезул гIахьаллъула 20-гIанасеб %. Аслиго аскомицетал (~98%), хутIарал базидиомицетал (~0,4%), цогигиял уна дейтеромицетазулIе. Руго, жиделI гIурдахIанил мес мицеляриял актиномицетазул прокариотаз ккурал, актиноквенщалги. 85%-улI фотобионт гIурччинал лъелхурдузул, дандчIвала 30 тухумалъул 80 регI, гьезда гьоркьосаги жадгояблъун рикIкIунеб Trebouxia (70-лдаса араб квенщазул %-улI жиб бугеб). ЦианобактериязулIаса (10-15% квенщазулI) гIахьаллъула киналго чIахIиял къокъабазул бегIал, Oscillatoriales хутIизегIан. Бищунго цIикIкIун гIахьаллъи гьабула Nostoc къокъица. ЦIикIкIуниса бутIа рукIуна гетероцистиял формаби Nostoc, Scytonema, Calothrix ги Fischerella. Квенщул талломалъуб цианобионталъул клеткабазда структурго ги функциалго модифициризе кIола: гьезул щват кIодолъула, форма хисула, карбоксисомазулги тIалIул материалалъулги рикIкIен дагьлъула, клеткабазул гIейги рикьги хьадарлъула. Фотобионталдаги гIурдахIанидаги гьоркьоб бугеб хурхен рикIкIине бегьула паразитизм гIадин гIурдахIанил рахъалIан. Кванщул компонентазда гьоркьоб бугеб контакт букIине бегьула батIи-батIияб:

• цIанбитIараб контакт гьечIо,
• тIасанлъудасан,
• гаусторияздалъун гIурдахIан борчIула лъелхарил логолIе

Компонентазул хурхадулI бихьула тIеренаб баланс. Масала, фотобионталъул клеткабазул рикьи хурхун букIунеб буго гIурдахIанил гIевуда. Микобионталъе фотобионталдасан щолел руго бетIербахъуе къваригIунелщинал жал, кIиабилелъ фотосинтезалдалъун гIезарулел. ГIурдахIаница лъелхарие чIезабулеб буго гьелъие дандекколеб микроклимат: бакъвавудаса цIунулеб буго, ультрафиолеталъул чIораздаса экранирулеб буго, цIекIхIалал субстратазтIа бетIербахъи унголъизабулеб буго ги гь. ц. ГIурччинал лъелхурдузулIан рачIунел руго гIемератомиял спиртал, рибит, эритрит яги сорбит кинал, гIурдахIанилI цIакъ бигьаго регьунел. Цианобактерияз гIурдахIанилI аслиго баччулеб буго глюкоза, цинги азотгъорлIругел жал. ГIурдахIанилIан фотобионталъулIе унеб жодул чвахи жеги бихьичIо.

БегI

Квенщазул рукIуна гIемерал кьерал: хъахIалдаса канчIтIогьилалде, буриялде, сирениялде, оранжиялде, румалде, гIурччиналде, хъахIилалде, цIахIилалде, чIегIералде гIунтIизегIан.

БагIида рекъон квенщал рукIуна чанго батIиял:

• Хъертилал, яги макъралал. Гьадинал квенщазул таллом макърада (яги «хъертида») релълъараб букIуна, гъоркьияб гIорхъи субстратгун гъункун цолъула, гIезагIан жибго хвечIого гьелдаса батIалъизеги батIалъуларо. Хъертилал квенщазда кIола хъерабазда, кьурабазда, гъутIбузда, бетоналъул къадаздацин бетIербахъи гьабизе. КидагогIангуреб гьадинал квенщал лIугьуна субстраталъулI, къватIихунсан балагьани, ругищан лъалареб хIалалда.
• ТIамахгIадал. ТIамахгIадал квенщазул букIуна пластиназул гIадинаб батIи-батIиял формабазул ги щватазул бегI, хъертилал гIадин субстратазда гъункун рекIун рукIунаро.
• Хъархъахарал. Морфологиялда рекъон бищунго захIматал хъархъахарал квенщазул талломалъ лIугьинарула гIезагIан гургинккарал яги цIанбитIарал гIаркьалаби. Гьадинал квенщазда кIола ракьутIа рижизе, цинги рукIуна гъутIбуздасан, гIутIбузул хутIалабаздасан, кьурабалIан гIодор далун.

ГIейги бетIербахъул халалъиги

Квенщазул букIуна цIакъ хьвадараб гIей, хIо гьеб бараб букIуна гьелда сверун бугеб къадаралда рекъон. Бакъвани, цо мисалалда рекъон, гьезда кIолеб буго 40-го гIун соница бакъвадго хутIизе, гьелдаса нахъе лъим щвани, гьел цIилъунги рачIуна. ЦIамукъаб цIадал, щубил яги роччадул лъим щварабго квенщал, метаболизм цIилъизабун, хеккого активияб хIалиде руссуна. Цо-цо нухалъ квенщал лъагIалиде анцIго мм-де щвезегIан гурони гIоларо. КидагогIан цо сантиметралдаса дагь. МахIахIалал, руччарал бакIазда, гьазие дандекколеб температураги ругел, масала, хьухьатал яги цIадхIалал тропикиял рохьазда квенщал лъагIалица чанго сантиметралъ гIола.

Хъертилал квенщазул гIевулаб зона букIуна квенщул рагIалабалI, тIамахгIадазул ги хъархъахаразул — щибаб тIогьиб.

Квенщал руго халатго бетIербахъи гьабизе кIолел организмал. Цо чанго нусго сон яги 4500 сонцин, мисалалъе Гренландиялда бетIербахъи гьабулеб бугеб ризокарпон географикияб (Rhizocarpon geographicum) бачани.